Mobile menu

የብረታ ብረት ኢንዱስትሪ ልማት ኢንስቲትዩት አመሠራረት

በአገራችን የብረታ ብረት እና ኢንጂነሪንግ ኢንዱስትሪ ተቋም በመንግሥት ሲጠናና ሲቋቋም መነሻ መሠረቱ የካቲት 1973 ዓ.ም. በኢትዮጵያ መንግሥትና በተባበሩት መንግሥታት የልማት ፕሮግራም መካከል የተደረገው የእርዳታ ስምምነት ነበር፡፡

የብረታ ብረት እና ኢንጂነሪንግ ንዑስ ዘርፍ ኢንዱስትሪዎች ችግር ውስጥ በነበሩበት ወቅት የኢንጂነሪንግ ዲዛይንና ቱል ድርጅት 1975 ዓ.ም. ተፀነሰ፡፡በ1983 ዓ.ም. የመንግሥት ለውጥ ተደርጎ የሽግግር መንግሥቱ አዲስ የኢኮኖሚ ፖሊሲ መተግበር መጀምሩ የድርጅቱን መፈጠር እንዲጎላ አድርጓል፡፡የኢንጂነሪንግ ዲዛይንና ቱል ድርጅት ሲመሰረት ዓላማው መሳሪያዎች፣ቱሎችና ሌሎች ቁሳዊ ግኝቶችን ዲዛይን አድርጎ በመፈብረክ ለብሔራዊ ኢኮኖሚ አስተዋጽኦ ማድረግ ነበር፡፡

የኢንጂነሪንግ ዲዛይንና ቱል ድርጅት የጥናት ሰነዶች በሶስት የውጭ አገር ተቋራጮች የተዘጋጀ ሲሆን 1977-1978 ዓ.ም. ቤልጂየም በሚገኘው ዲ.ጂ.ኤስ. በሚባል ድርጅት፣ከ1979-1982 ዓ.ም በኒውዝላንድ የሚገኘው ቤካ ኢንተርናሽናል በሚባል ድርጅት የህንፃው ዲዛይን ሥራ፣ የሥልጠና ፕሮግራሞችን ወርክሾፖች፣ የዕቃዎች ስፔሲፊኬሽን በማዘጋጀት የሰራ ሲሆን ህንዱስታን ማሽን ቱልስ ኢንተርናሽናል የሚባል የሕንድ ድርጅት ደግሞ ቢ.ደብሊው.አይ የተባለ ድርጅትን በመተካት በቱል ዲዛይን፣በቱል ሥራ፣በኢንጂነሪንግ ዲዛይንና በሙከራ ምርት ፍብረካ፣በኤክስፖርት አገልግሎትና የሥልጠና ፕሮግራም በማመቻቸት አገልግሏል፡፡

በዲዛይንና ቱል ድርጅት የቱል ዲዛይን ሥራ የተጀመረው ሐምሌ 1982 ዓ.ም. ሲሆን የቱል ሾፕ ሥራ ደግሞ ህዳር 1985 ዓ.ም. ነበር፡፡ የኢንጂነሪንግ ዲዛይን ሥራዎች የተጀመረው መስከረም 1983 ዓ.ም. ነበር፡፡የኢንጂነሪንግ ዲዛይንና ቱል ድርጅት የግንባታ ፕሮጀክት ወጪ በኢትዮጵያ መንግሥትና በተባበሩት መንግሥታት የልማት ፕሮግራም በጋራ የተሸፈነ ሲሆን ኢትዮጵያ 16,500,000 ብርና በድርጅቱ በኩል ደግሞ 6,682,705 የአሜሪካን ዶላር ወጭ ተደርጓል፡፡

የኢንጂነሪንግ ዲዛይንና ቱል ድርጅት ከሌሎች ሶስት ተመሳሳይ ተግባራት ካላቸው የመንግሥት ተቋማት (ድርጅቶች) ጋር በመዋሀድ የመሠረታዊ ብረታ ብረትና ኢንጂነሪንግ ኢንዱስትሪ ኤጀንሲ ተብሎ በአዋጅ ቁጥር 47/1989 ተቋቋመ፡፡ ይህ ኤጀንሲ ሁለት ዋና ዋና ተግባራትን ማለትም የምርት ልማትና የኢንዱስትሪ ድጋፍ አገልግሎት ለመስጠት ከ1989-1996 ዓ.ም. ሲንቀሳቀስ ቆይቷል፡፡

ኤጀንሲው ከሐምሌ 1996 ዓ.ም ጀምሮ ወደ ቀድሞው የንግድና ኢንዱስትሪ ሚኒስቴር ሲጠቃለል የብረታ ብረት ምርት ልማት ማዕከል የሚል ስያሜ ይዞ ሲሆን ዓላማውም በገበያ ፍላጎት ላይ የተመሰረተ አዳዲስ የምርት ልማት ሥራዎችን ማከናወንና ለጥቃቅንና አነስተኛ ኢንዱስትሪዎች እንዲሁም ለገጠር ልማት ተስማሚ ቴክኖሎጂዎች፣ የዲዛይንና ማኑፋክቸሪንግ አቅም ማጎልበት የሚል ነበር፡፡

የብረታ ብረት ምርት ልማት ማዕከል ከግንቦት 2002 ዓ.ም. ጀምሮ በሚኒስትሮች ምክር ቤት ደንብ ቁጥር 182/2002 የብረታ ብረት ኢንዱስትሪ ልማት ኢንስቲትዩት በሚል አዲስ አደረጃጀት፣ዓላማና ተልዕኮ ይዞ ብቅ አለ፡፡ኢንስቲትዩቱ በ182/2002 እንደገና ሲቋቋም ዓላማው የአገሪቱን የብረታ ብረት እና ኢንጂነሪንግ ኢንዱስትሪዎች ቴክኖሎጂዎች ልማትና ሽግግርን በማፋጠን ኢንዱስትሪዎቹ ተወዳዳሪ እንዲሆኑና ፈጣን ልማት እንዲያስመዘግቡ ለማብቃት የሚል ሲሆን ይህንን ዓላማ ማሳካት የሚያስችል ሥልጣንና ተግባራትም ተሰጥቶታል፡፡ የዛሬው የብረታ ብረት ኢንዱስትሪ ልማት ኢንስቲትዩት ዓላማውን ዕውን ለማድረግ የሚያስችሉ የተለያዩ እንቅስቃሴ ጀምሯል፡፡በውጤት ተኮር ሥርአት የተቃኘ 3 የትኩረት መስኮችን ማለትም የብረታ ብረት እና ኢንጂነሪንግ ኢንዱስትሪ ኢንቨስትመንት ማስፋፋት፣የብረታ ብረት እና ኢንጂነሪንግ ኢንዱስትሪ የማምረት አቅም ግንባታና የብረታ ብረት እና ኢንጂነሪንግ ምርቶች የገበያ ድርሻን ማስፋት የሚሉትን ቀርፆ ስትራቴጂክ እቅዱን በመተግበር ላይ ይገኛል፡፡