Mobile menu

የብረታ ብረት ኢንዱስትሪ ልማት ኢንስቲትዩት ከክልሎች እና ባለድርሻ አካላት ጋር በቅንጅት መስራት የሚያስችል የአንድ መቶ ቀን ዕቅድ አዘጋጅቶ በትግበራ ላይ ይገኛል፡፡

በተለይም አነስተኛና መካከለኛ አምራች ኢንዱስትሪዎች፣ ፍሌክስቢል ዎርክሾፖች፣ የቴክኒክና ሙያ ትምህርትና ሥልጠና ተቋማት፣ ከሚመለከታቸው የክልልና ከተማ መስተዳደር አመራሮች ጋር በቅንጅት ለመስራት እነዚህ ተቋማት ያሉበት ቁመና፣ ያሉባቸው ችግሮችና ከኢንስቲትዩቱ የሚፈለግ ሙያዊ ድጋፍ ለመለየት የመስክ ምልከታ በሁለት ምክትል ዋና ዳይሬክተሮችና በባለሙያ የተዋቀረ ቡድን ለቀናት ከክልሎች፣ ከከተማ መስተዳድሮችና ከአምራቾች ጋር በመገናኘት ውይይትና ጉብኝት አድርጓል፡፡

በዚህም መሠረት ከደቡብ ኢትዮጵያ ብሔሮች፣ብሔረሰቦችና ህዝቦች ብሔራዊ ክልላዊ መንግሥት ሀዋሳና ዲላ አካባቢ፣ ከኦሮሚያ ብሔራዊ ክልላዊ መንግሥት ሻሸመኔና አዳማ፣ ከትግራይ ብሔራዊ ክልላዊ መንግሥት አድግራት፣ውቅሮና መቀሌ እንዲሁም ከአፋር ብሔራዊ ክልላዊ መንግሥት አሳይታ ያሉትን ናሙና ተቋማትን በመውሰድ ምልከታ ከመደረጉም በተጨማሪ ውይይቶችም ተደርገዋል፡፡

 

በመስክ ምልከታው መርሀ-ግብርም የተገኙ ግብአቶችን በመለየት በመቶ ቀን ዕቅድ ውስጥ ተካትተው በኢንስቲትዩቱ አቅም የሚፈቱ ችግሮች በመፍታትና የሌሎችን የቅንጅት የሚፈልጉ ደግሞ በጋራ መፍትሔ እንዲያገኝ ከባለድርሻ አካላት ጋር ለመስራት እንቅስቃሴ የተጀመረ ሲሆን በቀጣይም በተቀሩት ክልሎችና ከተማ መስዳደሮች ተመሳሳይ የመስክ መርሀ-ግብሩ የሚቀጥል ይሆናል፡፡